Sejarah Pasar Gede
Mitra Javanologi, kanggo kowe kabeh kang manggon ing Solo Raya mesthine wis ora asing karo pasar kang siji iki. Pasar Gede Hardjonagoro yaiku salah siji pasar tradhisional paling gedhe ing kutha Solo kang ora tau leren beraktifitas suwene 24 jam saben dinane.
Pasar Gede diwangun dening siji arsitek kebangsaan Walanda, Ir Herman Thomas Karsten. Dheweke uga akeh ngrancang desain wewangunan jaman kolonial ing Semarang kaya Pasar Johar. Ciri kas wangunane yaiku wangunan urban kolonial kang dipadukan karo unsur lokal. Kaya kang ana ing Pasar Gede, awake dhewe isa weruh campuran saka unsur Jawa, Eropa, Cina, lan Arab ing wangunan pasar.
Saiki, pasar kang rame dadi tujuwan wisata iki wis umur 92 taun wiwit diresmekake Paku Buwono X ing 12 januari 1930. Aneka kuliner lan kebutuhan pokok kanggo warga Solo saperangan didistribusikake dening para pedagang liwat pasar iki.
Pasar Gede pirang-pirang taun pungkasan ora mung ditepang dadi pasar tradhisional wae, nanging ing sawatara area pasar saiki uga difungsikake dadi sentra kuliner. Akeh UMKM duwene bocah enom kang wiwit ngadol produke ing Pasar Gede, saengga wiwit akeh muda-mudi kang tilik menyang pasar iki.
Pasar Gede, kanggo saperangan kalangan dudu mung papan ing endi transaksi adol tuku komoditas dagang kadadeyan. Nanging Pasar Gede ya iku sawijining papan ikonik kang nyimpen sajarah dawa kutha Solo. Kawasan Pasar Gede ya iku kawasan kang kanthi langsung dadi tuladha kauripan Solo kang plural lan harmoni.
Mapan ing sisih kidul Pasar Gede, ngadeg klenteng Tien Kok Sie kang ya iku klenteng Vihara Avalokiteswara paling tuwa ing Solo. Papan iki dadi tujuwan utama kanggo masarakat saka jero utawa jabaning kutha Solo nalika pinuju dina perayaan Imlek. Dheweke kabeh mbaur ngrayakake kemeriahan dina gedhe etnis Tionghoa kasebut, tanpa nyawang beda keyakinan.
